Aikal lak tihtawp tumin huaisen takin sorkarin hma a la mek- ZPM Vice President

by News Editor

Tualchhung News

ZORAM TODAY| 30th July, 2024 (Tues): Nimin khan ZPM chuan an Party office ah chhung inkhawm an nei a, he hun hi R. Lalthanmawia, Adviser-in kaihruaiin C. Lalnunnema, Vice President chuan thu a sawi a, ZPM sorkar kal mek in thil ṭha tamtak a ti tawh a ti.

ZPM Vice President chuan, “MLA election campaign lai khan 'ZPM chu kan danglam ngam tur a ni,' tiin kan au thin a, Pathian leh mipui zarah sorkarna kan han chang ta a, famkim lovin duhthusam ang duak duakin thil kal lo mahse, thla reilote chhungin Chief minister Lalduhoma kaihhruai, ZPM ministry hian ram tana thil tha tam tak a ti tawh a ni,” a ti.

C. Lalnunnema chuan, "Kan policy ang ngeiin, MLA te mimal motor leina sorkar suma tumsak thin chu tih tawp a ni a, CM leh minister dangte hamthatna (facility) an neih House hold M.R chhawr theihte pawh a zat ve-a tih hniam a lo ni ta bawk a, heng atang ringawt pawh hian sorkar sum thahnem tham tak kan hum thei a, inrenchemna kawngah nasa takin ke kan pen mek a ni.

Tin, sorkar hmasa hun laia K. deposit-a bill tang Rs Vbc. 425.29 lai pek chhuah a ni ta te, Health care bill leh bill hrang hrang tangte pek chhuah a ni a, sorkar hnathawk te’n thla tirah hlawh an la thei ta te hi budget la pharh ve ngailo hmalakna ah chuan a ropui hle a ni," a ti.

ZPM Vice President chuan, "Kalphung thar mipui sorkar hnuaiah Mizoram zirna nasa taka siam that tum a ni a, hemi atan hian tunhnaiah casual teacher thahnem tak, teacher recruitment rules ang thlapa lak a ni a, sorkar hmasa hunlaia SEDP teacher lak dan nen chuan a danglam ta hle," a ti a.

"Hei bakah hian zirtirtu quarters leh school building sak chung changah pawh hma thar lak zel tum a ni a, aikal lak titawp tumin sorkar chuan huaisen takin hma a la mek a, kan ram zirna hi nasa taka siam that tum mek a ni," a ti bawk.

C. Lalnunnema chuan, "Kan policy-a kan lo dah tawh angin hriselna kawngah hma kan sawn theih nan theih tawp kan chhuah zel dawn a, medical college kan neih chhun ZMC pawh thuam chak tura hmalak mek niin, PHC ah pawh doctor dah kim thawhkhat a ni tawh a, Universal health care scheme buaipui chhoh mek a ni a, mi tin huapzo tura duan a niin sorkar thar hmalakna hi mipuiten a zar kan la zo chho zel dawn a ni,” a ti.

ZPM Vice President chuan, “Power-a kan intodelh theih nan hmalak mek a ni a, Lui pathum - Tlawng, Mat leh Tuivai khuap turin policy-ah kan dah a, heng lui 3 atanga power kan tharchhuah tur zat beisei hi 274 MW a ni a, heng hmalaknate hi a hlawhtlin hunah chuan Industry lian zawkte pawh kan ram ngeiah kan kalpui ve thei tawh dawn a ni," a ti a.

Kalphung thar mipui sorkar ah hmalakna leh hmachhawp thahnem tak a nei a, mipuite pawhin sorkar hmalakna kan thlawpa kan ram hruaitute tan kan tawngtaipui fo a tul thu a tarlang.